「有朋友提醒話唔好再鼓勵大家偷政府公物，的而且確根據現時法例大家就算執條樹枝都係犯法，如同我之前所講，如果想用請向園藝師或持有人查詢。」
公告出完我繼續要講的是現時政府唔俾大家執樹係冇錯的，因為法例就是法例，但問題在於點解冇木材資源處理？唔通堆填真係塵歸塵土歸土？
今次因爲山竹後大家諗塌樹可以去邊？一時間好多查詢好踴躍，甚至有機構開始諗木庫係唔係真係做得過，然而今次塌樹只是其中一個點。大家有冇想像過除咗塌樹，每年香港嘅工程開路及換樹計劃係以萬噸為單位，仲有之前曾經關心過的每日600噸卡板直入堆填區，仲有仲有成日出現的建築木廢料，呢啲加埋夠多了嗎？可以用數字比拼數字了嗎？仲係唔係微塵？
當我哋以堆填成為習慣，以數字去睇嘅時候，我哋仲會唔會諗到一啲可能？
試下想像今日我哋用咗香港木料做的一件物件，其實就係減少咗外地入口嘅碳排放（唔識得用專家述語去講呀），我唔知條數係唔係咁計，好多可能都係靠想像。有朋友以為我做傢俬講木藝就一定係諗點將木料變成傢俬料，所以就一定覺得行唔通，其實我哋一直有搜集資料，包括碳、夾板、堆肥、地板甚至貓砂，全部都係外國做得好好，但因為政府未準備好回收木料再造而變成天荒夜談。
呢兩年嚟一講起木庫，就好似日日經歷潑水節咁被潑一大盤冷水，由一開始氣餒到越潑越明確，因為多咗好多朋友同師傅一齊行，要知道呢個計劃要變成政府其中一個政策條路係有幾遠呀...，而係行業裡面大家有著唔同角色，我哋係做社區做公眾教育多啲，而你係識多啲技術運作、環保知識、創意嘅，一環緊扣一環，大家需要大家。
可能係呢幾日講太多而惹到人，但係我唔趁市民關注嘅時候引發，又幾時再有咁好機會？當部份人特別去搶某樹種時，就係因為缺少咗成個系統同教育。
冇樹係垃圾，而珍貴之處就睇係咪用得其所。
樹皮剝開後也是閃閃發亮