有冇諗過下一個「山竹」又嚟緊，到時大家打算點做？ （長文慎入）
要知道樹從來唔係垃圾，所以唔存在垃圾回收呢個字眼，上年草途堅拎唔回收樹就係呢個原因，因為我哋冇權去使用你哋屋苑/道路/公園嘅資源，我哋只可以教大家點樣處理，呢半年我哋去咗好多地方，亦覺得好似可以再堆前啲，不如俾我哋講下「木庫」。
「木庫」係咩嚟？
有時做到時間都亂哂，搵翻最早一篇草途的報導而關於「木庫」的是兩年前。兩年幾前因為唔捨得見到木資源被錯誤地處置到堆填，我哋透過工藝的手法開始實驗香港樹的可能，亦幸運地有大大少少的展覽機會令到我哋可以更癲地試，其中一個就係牛棚的「木庫實體站」，當時我哋係提出一個concept - 香港可唔可以建立木資源庫，結果因為一個颱風，討論效果超出我哋嘅想像，多咗好多朋友留意，亦多咗機構考慮攪番個。
但「木庫」對我哋嚟講係啲咩？
佢係一個系統，因為木林處理涉及好多的專門知識，如何開料如何乾木如何儲存等等，然後將已準備好的木料使用。當有木料時我哋就可以諗，可以係工藝師 x 設計師，也可以係社區 x 學生，多種可能性發生。
然而「木庫」係唔係要'唯一一個'機構做？參考「不是垃圾站」，如果能夠做到橫向發展，互不從屬又互相扶持支援，各區各機構及學校都有「木庫」，或可組成聯網分享，個想像空間大咗，做嘅嘢亦會多咗，令大家都知道點樣使用木資源，唔係只有'我哋'，唔再係由上而下，而係分享式資源。
我成日好囉嗦講咁多，因為我哋睇到呢個係一個資源，多咗人留意嘅時候自然多咗商人去諗點搵錢，搵錢冇罪，但浪費資源有罪。
借用上次白千層的照片 每棵樹可能都有個朋友想好好珍惜佢
希望其他樹都一樣